OBXECTIVOS

1. Conseguir que o produto final de Porco Celta chegue ao consumidor etiquetado cun código QR, certificado dixitalmente, para dotar o proceso de produción de total transparencia, claridade e confianza.

2. Definir o impacto medioambiental da produción mediante parámetros como a pegada de carbono ou a hídrica, de xeito que se lle acheguen ao consumidor final datos obxectivos sobre a sustentabilidade desta produción concreta.

3. Engadir maior valor ao produto, así como diferenciación respecto aos competidores e unha mellora no seu posicionamento no mercado.

4. Axudar, a través dos puntos anteriores, a retroalimentar iniciativas de recuperación e posta en valor de terras en desuso, así como promover o asentamento e inicio de actividade económica de xente nova nas zonas rurais máis desfavorecidas.

MEMBROS DO CONSORCIO

• FUNDACIÓN TERREO. Fundación municipal que persigue a posta en valor e o aproveitamento do patrimonio, co fin de fomentar o desenvolvemento rural e impulsar a economía social local e a creación de emprego en Ribeira de Piquín e o seu entorno, contribuíndo a frear o despoboamento do concello. Entre os proxectos que desenvolve está a xestión dunha granxa de Porco Celta en extensivo.
• INNOGANDO. Empresa especialista en achegar solucións tecnolóxicas as ganderías para mellorar a súa rendibilidade, o benestar animal e a xestión e calidade de vida do gandeiro, e cunha dilatada experiencia no desenvolvemento e fabricación de dispositivos de monitoreo de actividade e XPS para gando en extensivo.
• ASOPORCEL. Asociación sen ánimo de lucro que aglutina aos criadores da raza Porco Celta. É a entidade xestora do Libro Xenealóxico e do Programa de Cría da raza e responsable de verificar a trazabilidade no uso do selo 100% Raza Autóctona Porco Celta. Ademais, realiza o programa sanitario e achega asesoramento integral e personalizado ás granxas e participa en proxectos I+D+i, en programas de formación e en labores de promoción.
• S. COOP. GALEGA TRES FUCIÑOS. Cooperativa de pequenos produtores de Porco Celta que transforman e elaboran produtos derivados desta raza que comercializan eles mesmos.
• USC-IBADER. Instituto universitario de investigación científico-técnica da Universidade de Santiago de Compostela situado no Campus de Lugo. Nel, o persoal investigador centra a súa actividade no medio rural a través de dúas liñas principais: a ambiental e os agrosistemas.
• MEDRAR SMART SOLUTIONS SL.  Consultora especializada na prestación de servicios de I+D+i no sector agroalimentario, así como na coordinación de consorcios entre empresas, asociacións e centros de investigación para a xestión de proxectos de alto impacto no sector.
• PYRAMIS. Empresa especializada no desenvolvemento de softwares para incorporar solucións tecnolóxicas e de innovación ao sector agroalimentario.
• TRANSMEDIA. Axencia especializada no sector agrogandeiro, desenvolve tarefas de comunicación, edición integral de publicacións, produción audiovisual e xestión de redes sociais.